Qıstıbí

Qıstıbí

Бу мәкаләнең кирилл әлифбасындагы игезәге бар.

Qıstıbí yä ki küzikmäk töçe qamırdan äzerlänä, anıñ eçenä töygän bäräñge, tarı botqası, töygän kinder orlığı, mäk w.b. salalar.

Bäräñge qıstıbíı

Bik qatı itmiçä genä töçe qamır basalar da, beraz totqaç, 75är gramlı kisäklärgä bülep, yuqa ğına itep cäyälär, cäyemnärne qızğan tabada, may sörtmiçä genä, başta ber, annarı ikençe yağın äyländerep peşerep alalar, suınmasın wä qatıp kitmäsen öçen berse östenä bersen öyep, tastımal belän qaplap quyalar. Çönki suınsa, urtalay böklägändä sına.

Qıstıbí eçenä salu öçen, bäräñge peşerep qaynar kileş töyälär, qaynar söt, sarı may salıp bolğatalar. Mayda qızdırılğan suğan belän dä bolğatırğa bula.

Äzer cäyemneñ yartasına bäräñge bolamığı yağıp tiz genä ikençe yağı belän qaplílar. Qıstíbínı qanat belän eretelgän sarı may belän maylap, tabınğa qaynar kileş birälär.

Ber qıstıbíğa: 75 g töçe qamır, 100 g bäräñge, 20 g suğan, 20 g söt, eçenä salırğa wä tışın maylarğa 20şär g atlan may.

Tarı qıstıbíı

Tarı yarmasınnan söt belän yomşaq qına botqa peşerälär, may salıp bolğatalar.

Qamırın wä qıstıbíın üzen näq bäräñge qıstıbíı şikelle äzerlilär.

Ber qıstıbíğa: 75 g töçe qamır, 150 g tarı botqası, eçenä salırğa wä tışın maylarğa 20şär g atlan may.

Kinder orlığı qıstıbíı

Kipterelgän kinder orlığın töyep ililär, kinder orlığına anıñ öçtän bere qädär bäräñge bolamığı, söt öste, may quşıp yaxşılap bolğatalar. Anı aldan äzerlängän cäyemneñ yartısına yağıp, ikençe yartısı belän qaplílar, maylap, 10 minut miçtä totalar.

Ber qıstıbíğa: 75 g töçe qamır, 120 g kinder orlığı, eçenä salırğa wä tışın maylarğa 20şär g atlan may.

Mäk qıstıbíı

Mäkne ililär dä qaynar suğa salıp bürtterälär, annarı iläktä sarqıtalar, kilegä salıp töyälär. Töygän mäkkä beraz qaymaq, şikär qomı östäp bolğatalar wä peşkän qamırğa yağıp, qısıp, maylap quyalar.

Ber qıstıbíğa: 75 g töçe qamır, 80-100 g töygän mäk, 20 g şikär qomı, 20 g qaymaq, eçenä salırğa wä tışın maylarğa 20şär g atlan may.