Казан утлары (журнал)

«Казан утлары» — 1922 елдан Казанда татар телендә чыгучы журнал. XX гасырның икенче чирегендә ул татар халкының төп журналы булган. Бөек Ватан сугышы чорында да, СССРда күпләп газета-журнал ябылып торганда да ул чыгудан туктамаган.

Татар язучыларының иң яхшы романнары, повестьлары, хикәяләре әүвәл шушы журналда дөнья күрә. Биредә шулай ук пьесалар, күренекле шәхесләрнең истәлекләре һәм көндәлек язмалары, театр һәм җыр сәнгате турындагы мәкаләләр, юмор-сатира әсәрләре басыла. Татар халкының тарихы, рухи мирасы һәм хәзерге хәле журналның төп, үзәк темасы булып тора.

Журналның гамәлгә куючысы — «Татмедиа» ААҖ. Баш мөхәррире — Татарстанның халык шагыйре Равил Фәйзуллин. Журналга Русия Федерациясенең барлык почта бүлекчәләрендә дә язылып була.

Тарих

• 1922 елның май аеннан бирле татар телендә чыга.
• 1922-30 елларда — «Безнең юл», 1930-33 елларда — «Атака», 1933-65 елларда — «Совет әдәбияты», 1965 елдан башлап «Казан утлары» исеме белән дөнья күрә.
• 1977 елның 17 гыйнварында «Мактау билгесе» ордены белән бүләкләнә.
• 2006 елның февралендә «Казан утлары», элекке СССРның әдәби журналлары арасында беренче булып, 1000нче санын чыгарды. Шул мең саннан иң шәп әсәрләрне сайлап, «Сүнмәс утлар балкышы» дигән, матбугатта бик югары бәя алган антология дә нәшер ителә.

Кызыклы фактлар

• Бөек Ватан сугышы чорында аның кайбер нөсхәләрен, корал һәм азык-төлек белән бергә, дошман тылындагы сугышчыларга парашют белән ташлаганнар.

Элемтә

• Редакция адресы: 420066, Казан, Декабристлар урамы, 2.
• Email: kazanutlari@yandex.ru

Сылтамалар

• «Казан утлары» сайты