Нияз Әхмәров

Нияз Үзбәк улы Әхмәров — татар галиме, невропатолог, шул ук вакытта шагыйрь, журналист, тәрҗемәче.

Ул 1945 елда Казан шәһәрендә туа. Мәктәпне тәмамлагач, Казан дәүләт медицина институтының педиатрия факультетына укырга керә. Институтны тәмамлаганнан соң, ординатурада һәм читтән торып аспирантурада укый, нерв авыруларын дәвалаучы белгечлеге ала. 1971 елда Казан дәүләт университетының тарих-филология факультетының рус теле һәм әдәбияты бүлегендә укый. 1980 елда ул кандидатлык диссертациясе яклый, 1993 елдан — фәннәр докторы.

Нияз Әхмәров матур әдәбият өлкәсендә даими актив эш алып бара. Ул Габдулла Тукайның 60 тан артык шигырен, шул исәптән «Шүрәле», «Кәҗә белән Сарык хикәясе», «Печән базары, яхуд Яңа Кисекбаш» кебек зур күләмле әсәрләрен рус теленә тәрҗемә итә. Соңгы поэмага нигезләнеп, ул сценарий язып та бастырып чыгара.