Бәрәңге пәрәмәче
| Бәрәңге пәрәмәче | |
 | |
|
пәрәмәч | |
| авторлык | |
|---|---|
| Үз исеме |
Бәрәңге пәрәмәче |
| Автор |
халык ашы |
| Компонентлары | |
| Төп |
|
| Өстәмә |
|
| Азык кыйммәте | |
| Калориялеге: |
югары |
Бәрәңге пәрәмәче — әче камырдан бәрәңге өстәп пешерелгән пәрәмәч. Тик бу пәрәмәч итнекенә караганда ике тапкыр зуррак була.
Бәрәңге боламыгы әзерләү
[үзгәртү | вики-текстны үзгәртү]Пәрәмәч өчен бәрәңгене әрчиләр, юалар, күзәнәкләрен чокып алып, тозлы суда пешерәләр. Пешеп җиткәч, суын агызып, агач төйгеч белән бик яхшылап төяләр. Төйгән бәрәңгегә сөт, сары май салына, йомырка сытыла, кирәк кадәр тоз сибелә. Теләгән кешегә майда кыздырылган суган да салырга мөмкин.
Камыр әзерләү
[үзгәртү | вики-текстны үзгәртү]Камырны 70—80 грамм зурлыгындагы кисәкләргә бүлеп түгәрәкләп җәяләр һәм бәрәңгене салганчы, тирәсен күтәреп, түгәрәк савыт кебек итеп чеметеп чыгалар. Аның эченә алдан хәзерләп куелган шактый сыек бәрәңге боткасы салына һәм өсте чи* йомырка белән майлана, аннары майлаган табага тезеп шунда ук мичкә пешерергә куела.
Башка вариант
[үзгәртү | вики-текстны үзгәртү]Бәрәңге пәрәмәчен ит пәрәмәче кебек бөреп, өстендә кечкенә тишек калдырып кына да ясарга була. Бу вакыт изгән бәрәңгегә сөт һәм йомырка салынмый, бәлки майда кыздырылган суган гына өстәлә. Пешергәндә дә ит пәрәмәче кебек, ягъни башта табага ачык ягы белән салып кыздыралар, аннан аскы ягына әйләндереп пешерүне дәвам иттерәләр.
Рецепт
[үзгәртү | вики-текстны үзгәртү]Бер пәрәмәчкә: 70—80 грамм камыр, 50—60 грамм бәрәңге боткасы, боткага салу өчен 10 грамм, пәрәмәчне кыздыру өчен 7—8 грамм май, 10—15 грамм сөт, йомырка, кирәк кадәр тоз һәм борыч алына,
Тагын бер вариант
[үзгәртү | вики-текстны үзгәртү]Бәрәңге пәрәмәчен дә әче камырдан, ит пәрәмәче кебек ясап пешерәләр. Әрчеп юган бәрәңгене тозлы суда пешерәләр, суын түгеп, азрак ут өстендә тоткач, төяләр. Аннары кайнар сөт, сары май өстиләр, йомырка сыталар. Майда кыздырган суган салырга була. Камырны 50 г лы кисәкләргә бүләләр дә җәяләр, эченә бәрәңге салып, кырыйларын күтәреп бөрәләр. Пәрәмәчнең өстенә чи йомырка сөртәләр, майлы табага төзеп, шунда ук кызу мичкә яисә духовкага тыгалар. Пәрәмәчне яртылаш күмелерлек майга салып кыздырырга да мөмкин.
Рецепт
[үзгәртү | вики-текстны үзгәртү]50 г камыр, 50 г бәрәңге, 15 г башлы суган, 10 г сары май, кыздыру өчен 7 г май, 15 г сөт, 1/8 йомырка, тоз, борыч.
Чыганаклар
[үзгәртү | вики-текстны үзгәртү]- Юныс Әхмәтҗанов. Татар халык ашлары. К.; ТКН, 1969 ел.
- Татар халык ашлары. Руcчадан Р. Х. Камалова, В. Р. Шәрипова тәрҗемәсе. -Казан:Татарстан китап нәшрияты, 1987
