Илшат Нуриев

Илшат Нуриев
Туган	6 ноябрь 1967(1967-11-06) (56 яшь) Апаз,Арча районы, Татарстан АССР, ССРБ
Ватандашлыгы	Россия Федерациясе
Әлма-матер	Казан авыл хуҗалыгы институты Мәскәү коммерция академиясе
Һөнәре	район башлыгы

Илшат Габделфәрт улы Нуриев (1967 елның 6 ноябре, Апаз авылы, Арча районы, Татарстан АССР, ССРБ) — Россия муниципаль эшлеклесе. Арча муниципаль районы башлыгы (2015 елдан). Икътисад фәннәре кандидаты.

Тормыш юлы

1967 елның 6 ноябрендә Татарстан АССРның Арча районы Апаз авылында туа. 1983 елда Арча районының «Ватан» совхозында тракторчы булып хезмәт эшчәнлеген башлый. 1990 елда «икътисадчы-оештыручы» белгечлеге буенча Казан авыл хуҗалыгы институтын тәмамлый. 1996 елда «менеджмент» белгечлеге буенча Мәскәү коммерция академиясен тәмамый.

1990—1996 елларда — Балтач районы кулланучылар җәмгыятенең колбаса цехы башлыгы. 1996 елдан Балтач район кулланучылар җәмгыяте рәисе урынбасары. 1999 елдан 2008 елга кадәр — Саба районында «Шәмәрдән ит комбинаты» ААҖ генераль директоры. 2008—2009 елларда — Казан дәүләт аграр университеты проректоры. 2009 елдан «Вамин-Татарстан» ААҖ филиалы «Балтач май-сөт комбинаты» директоры. 2004 елда «Яңа мәгълүмати технологияләр нигезендә АПК предприятиеләре эшчәнлеге белән оператив идарә итү» темасына кандидатлык диссертациясен яклый.

2014 елда Татарстан Республикасы Арча муниципаль районы башкарма комитеты җитәкчесе итеп билгеләнә. 2015 елның сентябрендә Арча муниципаль районы башлыгы итеп сайлана.

Өйләнгән, ике баласы бар.

Бүләкләр

• 2006 — Татарстан Республикасының атказанган азык-төлек сәнәгате хезмәткәре;
• 2017 — «Фидакарь хезмәт өчен» медале.